Երևանն ու Թբիլիսին քննարկել են պաշտպանության հարցեր

Հայ-վրացական պաշտպանական համագործակցության հարցերը հեռախոսով քննարկել են՝ Հայաստանի և Վրաստանի պաշտպանության նախարարներ Սուրեն Պապիկյանը և Իրակլի Չիկովանին, հայտնում է Sputnik Արմենիան։

Ինչպես հայտնում է ՀՀ ՊՆ մամուլի ծառայությունը, զրուցակիցներն անդրադարձել են նաև առաջիկա գործողություններին, մտքեր են փոխանակել անվտանգության հարցերի շուրջ։

Պաշտպանության նախարարները վերահաստատել են հարաբերությունները զարգացնելու իրենց հանձնառությունը։

Հիշեցնենք, որ 2023 թվականի նոյեմբերին պաշտոնական այցով Հայաստանում էր՝ Վրաստանի այն ժամանակվա պաշտպանության նախարար Ջուանշեր Բուրչուլաձեի գլխավորած պատվիրակությունը։ Երևանում կողմերը ստորագրել են պաշտպանության ոլորտում համագործակցության պլանը։ 2022 թվականին Վրաստան էր այցելել ՀՀ պաշտպանության նախարար Սուրեն Պապիկյանը։