Ադրբեջանի նախագահի օգնականը Բրյուսելում քննարկել է Զանգեզուրի միջանցքի զարգացման հարցը

Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը Բրյուսելում հանդիպել է Եվրամիության անվտանգության և քաղաքականության հարցերով կոմիտեի անդամների հետ։

Report-ի փոխանցմամբ՝ Հիքմեթ Հաջիևը համապատասխան գրառում է արել X սոցիալական ցանցի իր էջում։

«Այսօր Բրյուսելում Եվրամիության անվտանգության և քաղաքականության հարցերով կոմիտեի անդամների հետ բովանդակալից քննարկումներ ունեցանք Ադրբեջանի և ԵՄ-ի միջև համագործակցության խորացման վերաբերյալ։ Շնորհակալ եմ կոմիտեի նախագահ, դեսպան Դելֆին Պրոնկային։ Ես կոմիտեի անդամներին տեղեկացրեցի Ադրբեջանի կողմից տարածաշրջանում առաջ մղվող խաղաղության օրակարգի, ինչպես նաև խաղաղության տնտեսական օգուտների, Զանգեզուրի միջանցքի զարգացման և վստահության ամրապնդման միջոցառումների մասին։ Շնորհակալություն եմ հայտնում կոմիտեի անդամներին ԵՄ-ի հետ մեր համագործակցությունն ու գործընկերությունը ամրապնդելու ապագա քայլերին իրենց լիակատար աջակցությունը հայտնելու համար», - գրել է Հաջիևը։