«Արյունալի միջադեպը, որը Բաստրիկինը փորձում է թաքցնել, պատվի հարց է ադրբեջանցիների համար» Ազգային ՈԿԿ-ների ֆորումը՝ Ադրբեջանում Ռուսաստանի դեսպանին

Ադրբեջանի Ազգային ՈԿԿ-ների ֆորումը բաց նամակ է հղել ՝Ադրբեջանում Ռուսաստանի Դաշնության դեսպան Միխայիլ Եվդոկիմովին։
 
APA-ի փոխանցմամ՝ նամակում ասվում է.
 
«Մենք՝ Ադրբեջանի Ազգային ՈԿԿ-ների ֆորումի ներկայացուցիչներս, որն իր շարքերում  միավորում է հարյուրավոր ադրբեջանական ՈԿԿ-ներ, դիմում ենք ձեզ՝ կապված Ռուսաստանի Դաշնության քննչական կոմիտեի նախագահ Ալեքսանդր Բաստրիկինի՝ Ադրբեջանի գլխավոր դատախազին ուղղված՝ ԶԼՄ-ներում հրապարակված նամակի հետ, որը վերաբերում էր AZAL ինքնաթիռի հետ կապված միջադեպին»։
 
Այն ժամանակ, երբ ադրբեջանական հանրությունը սպասում է, որ Ռուսաստանի քննչական մարմինները կբացահայտեն՝ 2024 թվականի դեկտեմբերի 25-ին Գրոզնիի վրա՝ «Պանցիր-Ս1» զենիթահրթիռային և հրետանային համակարգից արձակված հրթիռներով խոցված AZAL-ի ինքնաթիռի հետ կապված միջադեպի պատասխանատուներին և կկիրառեն ամենախիստ պատիժը, Ալեքսանդր Բաստրիկինի հայտարարությունը՝ այս քրեական գործը կարճելու մասին անհասկանալի և անընդունելի է։
 
Այն պնդումը, որ իբր ինքնաթիռը չի կարողացել վայրէջք կատարել Գրոզնիում՝ անբարենպաստ եղանակային պայմանների պատճառով, և բոլոր լուսանկարչական ու տեսաապացույցների անտեսումը փորձ է՝ անպատիժ թողնելու անմեղ մարդկանց վնասվածքների և մահվան հանգեցրած ողբերգությունը և,  փաստորեն խրախուսում է նրանց, ովքեր կրակ են բացել նրանց վրա: Ադրբեջանական հանրությունը խորապես վրդովված է և մերժում է այս մեկնաբանությունը։
 
Արյունալի միջադեպը, որը Ալեքսանդր Բաստրիկինը փորձում է թաքցնել, հանդիսանում է ադրբեջանական ժողովրդի համար պատվի հարց: Մենք չենք լռելու: Եթե ռուսական կողմը կարծում է, որ Ադրբեջանին ներողություն խնդրելը կլուծի խնդիրը, դա հիմնարար սխալ է: Այս արյունալի հանցագործությունը պետք է ճանաչվի, մեղավորներից յուրաքանչյուրը պետք է քրեական պատասխանատվության ենթարկվի, իսկ Ադրբեջանի  պետությունը, տուժած ուղևորները և անձնակազմը պետք է փոխհատուցվեն: Սա միջազգային պրակտիկայի և ընդհանուր առմամբ ընդունված էթիկական չափանիշների միակ պահանջն է։
 
Քաղաքացիական ինքնաթիռի վրա հարձակումը և դրա խոցումը Չիկագոյի միջազգային քաղաքացիական ավիացիայի մասին կոնվենցիայի կոպիտ խախտում է: Բաստրիկինի նամակը ուղղակիորեն հակասում է այս կոնվենցիայի դրույթներին, մասնավորապես՝ 13-րդ հավելվածին («Օդանավի վթարի և միջադեպի հետաքննություն»): Այս ողբերգությունը չի կարող անտեսվել։ Ընդհակառակը, պետք է ձեռնարկվեն բոլոր միջոցները՝ ինքնաթիռը խոցելու եղանակի և պատճառների վերաբերյալ համապարփակ հետաքննություն անցկացնելու համար։
 
Պարոն դեսպան, պատասխանեք մեզ. ո՞վ է արտահայտում Ռուսաստանի պաշտոնական դիրքորոշումը այս հարցում՝ նախագահ Վլադիմիր Պուտինը, թե՞ Քննչական կոմիտեի նախագահ Ալեքսանդր Բաստրիկինը։
 
Մենք ակնկալում ենք, որ դուք կընդունեք Ադրբեջանի ՈԿԿ-ների Ազգային ֆորումի խորհրդի անդամներին և կպատասխանեք մեր հարցին»։