Հայաստանը պատժված է. ծանրամարտի աշխարհի առաջնությունը կանցկացվի Բահրեյնում

Ծանրամարտի աշխարհի առաջնությունը Հայաստանում չի անցկացվի.

Այս մասին Facebook-ում գրել է Ադրբեջանի ծանրամարտի ֆեդերացիայի խորհրդի անդամ Անար Հուսեյնովը։

Նրա խոսքով, Երևանում անցկացված ծանրամարտի Եվրոպայի առաջնությունում մեր դրոշի հանդեպ ցուցաբերված բացահայտ անհարգալից վերաբերմունքը՝ «հերթական վառ ապացույցն է այն բանի, որ հայերը դեռ պատրաստ չեն ոչ միայն խաղաղության, այլ ընդհանրապես ամեն ինչի, հատկապես՝ ինչ-որ խոշոր սպորտային իրադարձություն կազմակերպելուն։

«Մեր դրոշի նկատմամբ նման անհարգալից վերաբերմունքից հետո պետք է պատիժ լիներ։ Հենց առաջին օրը մենք նամակներ ուղարկեցինք միջազգային հեղինակավոր կազմակերպություններին ու ֆեդերացիաներին, կապ հաստատեցինք, աշխատեցինք, որ պատասխան տրվի գործի թե՛ բարոյական, թե՛ իրավական կողմին, որպեսզի հայերի այս արարքը դատապարտվի։ Մեր հիմնական նպատակն էր՝ Հայաստանին զրկել 2024 թվականի աշխարհի առաջնությունը կազմակերպելու իրավունքից։ Եվ մեզ հաջողվեց, չնայած նրան, որ այս հարցն արդեն գործնականում լուծված էր։ Ծանրամարտի ֆեդերացիայի և Ադրբեջանի երիտասարդության ու սպորտի նախարարության համատեղ ջանքերն արդյունք են տվել։ Ծանրամարտի միջազգային ֆեդերացիայի հետ մեր գրեթե ամենօրյա գործունեության արդյունքում այսօր առավոտյան Կուբայում կազմակերպության գործադիր կոմիտեի նիստում որոշվել է՝ 2024 թվականի ծանրամարտի աշխարհի առաջնությունը անցկացնել ոչ թե Հայաստանում, այլ այդ իրավունքը փոխանցել Բահրեյնին։ Արդարությունը հաղթանակեց»,- հայտարարել է Անար Հուսեյնովը։