Ադրբեջանի ԱԳՆ. Զանգեզուրի միջանցքն ուղղված չէ Հայաստանի ինքնիշխանության դեմ

«Արևելյան Զանգեզուրի շրջանը Նախչըվանի Ինքնավար Հանրապետության հետ կապող միջանցքի վերաբերյալ Ադրբեջանի դիրքորոշումը սկզբունքային է և հիմնված իրավական հիմքերի և տարածաշրջանային համագործակցության շահերի վրա: Ինչպես հայտնի է, 2020 թվականի նոյեմբերի 10-ի եռակողմ հայտարարության 9-րդ կետի համաձայն՝ պետք է ապահովվի Ադրբեջանի արևմտյան մասի և Նախչըվանի Ինքնավար Հանրապետության միջև անարգել տեղաշարժը»:

Այս մասին APA-ին ասել է Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեն:

«Մենք բազմիցս ընդգծել ենք, որ Զանգեզուրի միջանցքը ուղղված չէ Հայաստանի ինքնիշխանության դեմ: Նպատակը բացարձակապես անարգել տարանցիկ երթևեկության ստեղծումն է՝ համաձայն միջազգային իրավունքի և ձեռք բերված պայմանավորվածությունների: Մենք կարծում ենք, որ Զանգեզուրի միջանցքը կնպաստի տարածաշրջանի տնտեսական ինտեգրմանը և Միջին միջանցքի շրջանակներում լրացուցիչ երթուղիների ձևավորմանը»:

«Օգոստոսի 8-ին Վաշինգտոնում կայացած գագաթնաժողովի հիմնական արդյունքներից մեկը «Թրամփի միջազգային խաղաղության և բարգավաճման երթուղին» (TRIPP) էր, որը կապահովի Զանգեզուրի միջանցքով անարգել անցում և կամրապնդի տարածաշրջանային կապերը։ Համատեղ հռչակագրում ընդգծվել է տարածաշրջանում հաղորդակցությունների բացման շրջանակներում Ադրբեջանի հիմնական մասի և Նախչըվանի Ինքնավար Հանրապետության միջև անարգել հաղորդակցություն ապահովելու անհրաժեշտությունը», - նշել է ԱԳՆ ներկայացուցիչը։