AZAL-ի ինքնաթիռը խոցվել է. Ադրբեջանի, Ղազախստանի, Ռուսաստանի և ICAO-ի համատեղ եզրակացությունը

Ադրբեջանական կողմը տեղեկատվություն է տարածել AZAL-ի ինքնաթիռի կործանման տարելիցի կապակցությամբ Ղազախստանի կողմից հրապարակված նախնական հայտարարության վերաբերյալ։

AZERTAC-ի փոխանցմամբ՝ հայտարարության մեջ նշվում է, որ Embraer 190-100 IGW ուղևորատար ինքնաթիռի կործանման հետաքննությունը շարունակվում է՝ Չիկագոյի միջազգային քաղաքացիական ավիացիայի կոնվենցիայի 13-րդ հավելվածի հիման վրա։ Նշվում է, որ հետաքննությունն անցկացնում է Ղազախստանի տրանսպորտի նախարարությունը՝ Միջազգային քաղաքացիական ավիացիայի կազմակերպության (ICAO), Ադրբեջանի, Բրազիլիայի և Ռուսաստանի ներկայացուցիչների մասնակցությամբ։ Այս հետաքննությունից բացի, երեք երկրների (Ադրբեջան, Ղազախստան և Ռուսաստան) քննչական մարմինները նույնպես քրեական հետաքննություն են անցկացնում միջադեպի վերաբերյալ իրենց իրավասության շրջանակներում։

ICAO-ի պահանջներին համապատասխան՝ Ղազախստանը այս տարվա փետրվարի 4-ին հրապարակել է նախնական զեկույց, որը արտացոլում է միայն հաստատված փաստերը և չի պարունակում որևէ վերլուծություն կամ եզրակացություն։

Վերջնական զեկույցը, որը պետք է ներառի Չիկագոյի կոնվենցիայի շրջանակներում անցկացված հետաքննության արդյունքները, հնարավոր չի եղել վերջնականապես պատրաստվել կործանման տարելիցին։ Հենց դրա համար էլ, Ղազախստանը հանրությանն է ներկայացրել ժամանակավոր հայտարարություն՝ համաձայն ICAO պահանջների։

Միջանկյալ հայտարարության մեջ ընդգծվում է, որ թթվածնի բալոնները վնասված չեն եղել, ինչը բացառում է ներքին պայթյունը։ Այն նաև պարունակում է տեղեկություններ զենքի համակարգին պատկանող օտարերկրյա մետաղական առարկաների մասին, որոնք ինքնաթիռը վնասած պայթուցիկ սարքի մասնիկներ են։ Սակայն, ժամանակավոր հայտարարության մեջ չի նշվում այդ զենքի համակարգի մոդելը։ Հիշեցնենք, որ Ռուսաստանի նախագահն արդեն իսկ քաղաքական հայտարարության մեջ նշել է, որ այդ զենքի համակարգը պատկանում է Ռուսաստանի պաշտպանության նախարարության ՀՕՊ ուժերին։