Մուստաֆաևը՝ Իրանի հետ համագործակցության զարգացման հեռանկարների մասին

Ադրբեջանա-իրանական հարաբերությունները դրական դինամիկա են ձեռք բերել նոր իրողությունների ֆոնին։

Ինչպես տեղեկացնում է Caliber.Az-ը, այս մասին հայտարարել է Ադրբեջանի փոխվարչապետ Շահին Մուստաֆաևը Բաքվում Իրանի Ազգային օրվա կապակցությամբ կազմակերպված պաշտոնական ընդունելության ժամանակ։

Նրա խոսքով, առաջընթաց է նկատվում նաև տարբեր համատեղ նախագծերի իրականացման գործում։

Մուստաֆաևն ընդգծել է, որ երկու երկրների նախագահները մեծ նշանակություն են տալիս երկկողմ համագործակցության զարգացմանը, մասնավորապես՝ համատեղ նախագծերի և համաձայնագրերի իրականացմանը, որոնք ուղղված են ողջ տարածաշրջանի զարգացմանը։

«Նախագահ Իլհամ Ալիևը յոթ անգամ այցելել է Իրան, ինչը ցույց է տալիս, որ երկրի ղեկավարը կարևոր է համարում ադրբեջանա-իրանական հարաբերությունների զարգացումը։ Դրանց զարգացման ներկայիս դինամիկան գոհունակություն է առաջացնում։ Լավ հեռանկարներ կան տնտեսության, առևտրի, ներդրումների, տրանսպորտի, էներգետիկայի, գյուղատնտեսության և այլ ոլորտներում համագործակցության ընդլայնման համար։ Անցյալ տարի մեր երկրների միջև ապրանքաշրջանառության ծավալն աճել է ավելի քան 30%-ով»,- հավելել է նա։