Channel 12 ալիք. Իսրայելի, Սիրիայի և Թուրքիայի ներկայացուցիչները հանդիպել են Ադրբեջանում

Իսրայելը ներկայումս գաղտնի բանակցություններ է վարում Սիրիայի նոր կառավարության հետ՝ Միացյալ Արաբական Էմիրությունների միջնորդությամբ ընթացող խաղաղության գործընթացի շրջանակներում։
 
Ինչպես հաղորդում է Caliber.Az-ը՝ հղում անելով իսրայելական Channel 12 հեռուստաալիքին, կարևոր հանդիպումներից մեկը վերջերս տեղի է ունեցել Ադրբեջանում, որտեղ Իսրայելի պաշտպանության ուժերի գլխավոր շտաբի օպերատիվ վարչության պետ, գեներալ-մայոր Օդեդ Բասյուկը հանդիպել է՝ Սիրիայի նախագահ Ահմեդ ալ-Շարաայի մտերիմ ներկայացուցիչների, ինչպես նաև թուրք պաշտոնյաների հետ։
 
Աղբյուրները նշել են, որ Սիրիային տարածաշրջանային նախաձեռնություններում, ինչպիսին է Աբրահամի համաձայնագիրը, ներառելու հնարավորությունից բացի, կա դրական տեղաշարժի ներուժ Թուրքիայի հետ դժվարին հարաբերություններում, որը նույնպես բանակցությունների կողմ է։ Իսրայելը ընդգծել է, որ սա դեռևս նախնական գործընթաց է, բայց տարածաշրջանային կարգի ձևավորման վրա ազդելու հնարավորությունը միանշանակ օրակարգում է։