Հաջիզադե. TRIPP-ի վերաբերյալ շրջանակային փաստաթուղթը կարևոր քայլ է գործնական աշխատանքը սկսելու համար

Հունվարի 13-ին, Հայաստանի արտաքին գործերի նախարարի ԱՄՆ կատարած այցի ժամանակ հրապարակվեց՝ «Թրամփի ուղին՝ հանուն միջազգային խաղաղության և բարգավաճման» (TRIPP) ծրագրի իրականացման վերաբերյալ շրջանակային փաստաթուղթը։
 
Մեկնաբանելով՝ տվյալ փաստաթուղթը, Ադրբեջանի արտաքին գործերի նախարարության մամուլի  քարտուղար Այխան Հաջիզադեն նշել է, որ այն ևս մեկ անգամ ցույց է տալիս ամերիկյան կողմի հավատարմությունը՝ օգոստոսի 8-ին Վաշինգտոնում կայացած գագաթնաժողովում ձեռք բերված պայմանավորվածություններին և կարևոր քայլ է հանդիսանում՝ այս ուղղությամբ գործնական աշխատանքը սկսելու համար, հայտնում է Caliber.Az-ը։
 
«Սա կարևոր է նաև Հայաստանի ստանձնած պարտավորությունների կատարման առումով։ Ադրբեջանի և Նախչըվանի Ինքնավար Հանրապետության միջև անարգել հաղորդակցության ապահովումը մեր երկրի գերակա խնդիրներից մեկն է։ TRIPP երթուղին կարևոր է նաև՝ ավելի լայն տարածաշրջանում առևտրի և կապերի դիվերսիֆիկացման առումով», - ասել է Այխան Հաջիզադեն։