Քյուրշադ Զորլու. Զանգեզուրի միջանցքը կարևոր է ամբողջ տարածաշրջանի համար

Թուրքիան վճռականորեն տրամադրված է բացել Զանգեզուրի միջանցքը, աշխատանքները շարունակվում են։

Ինչպես հաղորդում է Report-ը՝ հղում անելով թուրքական լրատվամիջոցներին, այս մասին հայտարարել է իշխող «Արդարություն և զարգացում» կուսակցության (AKP) փոխնախագահ Քյուրշադ Զորլուն Էդիրնե քաղաքում կայացած կուսակցության ժողովում։

Նա նշել է, որ ձեռնարկվում են համապատասխան քայլեր Զանգեզուրի միջանցքը բացելու համար, որը Թյուրքական պետությունների կազմակերպությունը (ԹՊԿ) կվերածի կարևոր տարածաշրջանային դաշինքի, ինչը ապագայում կապահովի տարածաշրջանում խաղաղություն և բարգավաճում. «Միջանցքը կապահովի Թուրքիայի և Ադրբեջանի միջև ուղիղ ճանապարհային կապ։ Մեր հարգարժան նախագահ (Ռեջեփ Թայիբ Էրդողան - խմբ.) ունի ուժեղ կամք այս հարցում, և Ադրբեջանի և Թուրքիայի միջև լուրջ քննարկումներ են ընթանում այս թեմայով»։

Քաղաքական գործիչը շեշտել է, որ Զանգեզուրի միջանցքը կարևոր է ոչ միայն Թուրքիայի և Ադրբեջանի, այլև ամբողջ տարածաշրջանի համար. «Չինաստանի սահմանից դուրս եկող բեռները այս երթուղով կուղարկվեն Եվրոպա՝ Թուրքիայի տարածքով»։