Reuters. Բաքուն խաղաղապահներ չի ուղարկի Գազա, մինչև լիակատար հրադադար չհաստատվի

Ադրբեջանը խաղաղապահներ ուղարկելու պլաններ չունի Գազա, մինչև Իսրայելի և Համասի միջև մարտական ​​գործողությունները լիովին չդադարեն։
 
Caliber.Az-ի փոխանցմամբ, այս մասին Reuters-ին հայտնել է Ադրբեջանի արտաքին գործերի նախարարության աղբյուրը։
 
ԱՄՆ նախագահ Դոնալդ Թրամփի Գազայի խաղաղության պլանի շրջանակներում՝ Միացյալ Նահանգները բանակցություններ է վարում Ադրբեջանի, Ինդոնեզիայի, ԱՄԷ-ի, Եգիպտոսի, Կատարի և Թուրքիայի հետ՝ մոտավորապես 20,000 զինծառայողներից բաղկացած Միջազգային կայունացման ուժերի հնարավոր մասնակցության վերաբերյալ։
 
«Մենք չենք ցանկանում մեր զինվորներին վտանգի ենթարկել։ Սա կարող է տեղի ունենալ միայն այն դեպքում, եթե ռազմական գործողությունները լիովին դադարեցվեն», - հայտարարել է Ադրբեջանի արտաքին գործերի նախարարության աղբյուրը։
 
Նա նշել է, որ նման ցանկացած որոշում պետք է հավանություն ստանա   խորհրդարանի կողմից։ Խորհրդարանական անվտանգության հանձնաժողովի ղեկավարը Reuters-ին հայտնել է, որ այս հարցի վերաբերյալ դեռևս որևէ օրինագիծ չի ներկայացվել։