ԱԱՀ. Եվրախորհրդարանը COP29-ին ընդառաջ ակտիվացնում է Ադրբեջանի դեմ զրպարտչական արշավը

Որոշ արտաքին ուժեր, որոնք մտահոգված են, որ տարածաշրջանում Ադրբեջանի տարածքային ամբողջականության և ինքնիշխանության վերականգնմամբ կայուն խաղաղության համար հեռանկարներ կհայտնվեն, ակտիվացրել են իրենց ապակառուցողական գործունեությունը։ Այս ուղղությամբ հատկապես ակտիվ են ԱՄՆ Կոնգրեսը, Եվրախորհրդարանը, Ֆրանսիայի ու Նիդեռլանդների խորհրդարանները։
 
Ինչպես հաղորդում է Caliber.Az-ը, այս մասին ասվում է Արևմտյան Ադրբեջանի Համայնքի հայտարարության մեջ։
 
«Կեղծավորները, ովքեր տասնամյակներ շարունակ աջակցում էին՝ ադրբեջանցիներին Հայաստանի տարածքից և Ադրբեջանի օկուպացված տարածքներից վտարմանը, մեր մշակութային ժառանգության համակարգված ոչնչացմանը, այժմ մեղադրանքներ են ներկայացնում Ադրբեջանի դեմ։
 
Հոկտեմբերի 24-ին ընդունված Եվրախորհրդարանի բանաձևը՝ հայտնի շրջանակների կողմից Ադրբեջանի դեմ զրպարտչական արշավի շարունակությունն է, որը միայն ակտիվացավ COP29-ին ընդառաջ։ Եվրախորհրդարանը, որը 1988 թվականին կոչ էր անում նախկին ԼՂԻՄ-ը փոխանցել Հայկական ԽՍՀ-ին, այդ ժամանակվանից ինստիտուցիոնալ մակարդակի է հասցրել իր թշնամությունը ադրբեջանական ժողովրդի նկատմամբ և ընդունել միջազգային իրավունքին հակասող տասնյակ փաստաթղթեր՝ լի Ադրբեջանի դեմ ատելությամբ և զրպարտությամբ։ Անհրաժեշտ է նշել նաև, որ հոկտեմբերի 24-ի բանաձևն ընդունվել է՝ Եվրախորհրդարանի կողմից Կազանում Ադրբեջանի և Հայաստանի ղեկավարների հանդիպման օրը։
 
Մենք խստորեն դատապարտում ենք Եվրախորհրդարանի նման գործողությունները, որոնք ուղղված են խտրականությանը՝ էթնիկ և կրոնական հողի վրա, ծառայում են տարածաշրջանում հակամարտությունների բորբոքմանը, ինչպես նաև  դատապարտում ենք այդ ապակառուցողական գործողությունները որպես «մարդու իրավունքների պաշտպանություն» ներկայացնելու փորձերը։ Մենք շարունակելու ենք մերկացնել այդ տարրերի հակաադրբեջանական քաղաքականությունը, մարդու իրավունքների պաշտպանության պատրվակով իրենց քաղաքական օրակարգն առաջ տանելու նրանց փորձերը»,- նշել են համայնքում։