Արարատ Միրզոյանը՝ տրանսպորտային կոմունիկացիաների ապաշրջափակման կարևորության մասին

Երևանում Եվրոպական միության խորհրդի քաղաքական և անվտանգային հարցերով կոմիտեի պատվիրակության հետ հանդիպման ժամանակ ՀՀ արտգործնախարար Արարատ Միրզոյանը, անդրադառնալով Հարավային Կովկասում անվտանգության հարցերին, ներկայացրել է Հայաստանի և Ադրբեջանի միջև հարաբերությունների կարգավորման գործընթացի վերջին զարգացումները, փոխանցում է ՏԱՍՍ-ը:

Ընդգծելով ՀՀ պատրաստակամությունը՝ օգտագործել խաղաղության հասնելու հնարավորությունը՝ ՀՀ ԱԳՆ ղեկավարը նշել է, որ դա ենթադրում է խաղաղության պայմանագրում առանցքային հարցերի շուրջ փոխհամաձայնության արձանագրում՝ մասնավորապես 1991թ. Ալմա-Աթայի հռչակագրի հիման վրա տարածքային ամբողջականության ճանաչման փոխադարձ վերահաստատում և սահմանազատում:

Տարածաշրջանում տնտեսական զարգացման ապահովման համատեքստում նախարար Միրզոյանն ընդգծել է տրանսպորտային և տնտեսական կապուղիների ապաշրջափակման կարևորությունը՝ որպես այդ հարցում Հայաստանի շահագրգռվածության դրսևորում հիշատակելով Կառավարության մշակած «Խաղաղության խաչմերուկ» ծրագիրը։

«Հայաստանի ժողովուրդն ունի եվրոպական ձգտումներ, և մենք կառաջնորդվենք այդ ձգտումներով», - հայտարարել է Միրզոյանը: