Բորիս Ջոնսոնը կոչ է արել Ադրբեջանին միանալ ականների արգելման կոնվենցիային

«Ականները և այլ զինամթերքը օգտագործման համար ոչ պիտանի են դարձրել [ազատագրված] տարածքները։ Ես շատ գոհ եմ, որ ականազերծման գծով բրիտանական փորձագետներն ու ընկերությունները աշխատում են իրենց ադրբեջանցի գործընկերների հետ՝ այդ սպառնալիքը վերացնելու ուղղությամբ»։

Ինչպես հաղորդում է Caliber.Az-ը, այս մասին Բաքվի IX գլոբալ ֆորումի մեկնարկի կապակցությամբ Ադրբեջանի նախագահ Իլհամ Ալիևին ուղղված նամակում ասել է Մեծ Բրիտանիայի վարչապետ Բորիս Ջոնսոնը։

«Նոր ականների տեղադրումը կանխելու Ադրբեջանի հանձնառությունը և Հակահետևակային ականների արգելման կոնվենցիայի (Օտտավայի կոնվենցիա) ստորագրումը մեծ քայլ կլիներ խաղաղության հաստատման և այս հողերում բնակիչների հաջող բնակեցման ճանապարհին, ինչպես նաև կցուցադրեր տարածաշրջանային առաջնորդություն», - ընդգծել է Մեծ Բրիտանիայի վարչապետը: