Բրիտանացի խորհրդարանական. Աղդամում բոլոր տները քանդվել և ավերվել են

«Իմ ընտրվելուց ի վեր ես բազմիցս այցելել եմ Ադրբեջան: Այժմ ես առաջին անգամ եմ այցելում ազատագրված տարածքներ՝ տեսնելու, թե ինչ ավերածություններ են կատարվել այստեղ Հայաստանի կողմից օկուպացիայի ժամանակ։ Վերակառուցման և վերականգնման լայնածավալ աշխատանքներ են տարվում, որպեսզի մարդիկ կարողանան վերադառնալ այս գեղեցիկ վայրերը»։

Caliber.Az-ի փոխանցմամբ՝ այս մասին ասել է այցով Աղդամում գտնվող՝ Մեծ Բրիտանիայի Համայնքների պալատի՝ Ադրբեջանի հետ բարեկամության միջխորհրդարանական խմբի ղեկավար Բոբ Բլեքմանը։

Նրա խոսքով՝ բոլորն ուզում են վերադառնալ այստեղ, վերադառնալ հայրենիք. «Նրանց ընտանիքներն այստեղ են ապրել, այս մարդիկ ուզում են վերադառնալ իրենց արմատներին»։

Բրիտանացի պատգամավորը նշել է, որ ականների խնդիրը լուրջ խնդիր է այս շրջաններում, և ականազերծման մեծ աշխատանք է կատարվում. «Բացի այդ, ֆանտաստիկ աշխատանք է կատարվում նոր ճանապարհների, երկաթուղային գծերի անցկացման ուղղությամբ։ Նայում ենք շուրջբոլորը, այստեղ ամեն ինչ ավերվել է այդ տարիների ընթացքում, 30 տարվա ընթացքում, ավերածությունների հետքերն ամենուր են։ Չնայած նրան, որ այստեղ ռազմական գործողություններ են տեղի ունեցել, գրեթե ամեն տուն ավերվել է, քանդվել, շինանյութերը գողացվել են։ Այս վայրերի վաղ լուսանկարներում կարելի է տեսնել, թե ինչպիսին էր միջավայրը, շենքերը, մարդիկ սիրում էին ապրել այստեղ: Եվ ես չեմ զարմանում, որ մարդիկ ցանկանում են կրկին վերադառնալ»: