Թբիլիսիում հարձակվել են ադրբեջանցի գործարարի վրա

Թբիլիսիի «Lilo Mall» առևտրական կենտրոնում հարձակման է ենթարկվել էթնիկ ադրբեջանցի գործարար Ռոման Իսաևը։

Այս մասին հաղորդում է Caliber.Az-ը՝ «TV Pirveli»-ին հղումով։

Հաղորդվում է, որ գլխի շրջանում հրազենային վնասվածք ստացած գործարարը տեղափոխվել է հիվանդանոց, բժիշկները նրա վիճակը գնահատում են ծանր։

Նշվում է, որ զինված տղամարդը խնդրել է առևտրի կենտրոնում գտնվող տեքստիլ խանութի սեփականատեր Ռոման Իսաևին դուրս գալ դրսում՝ զրուցելու, սակայն նա հրաժարվել է։ Դրանից հետո հարձակվողը կրակ է բացել՝ վիրավորելով նրան, ապա դիմել փախուստի։

Հաղորդվում է, որ ոստիկանությունն այս պահին փնտրում է հանցագործին, վիրավորման պահը ֆիքսել է տեսահսկման տեսախցիկը։

Փաստի առթիվ քրեական գործ է հարուցվել.