Թոֆիգ Զուլֆուգարով. Ղարաբաղից հայերի արտահոսքը, ովքեր չեն ուզում ապրել Ադրբեջանում, հնարավոր չէ կասեցնել

Ադրբեջանի ԱԳՆ նախկին ղեկավար, քաղաքական վերլուծաբան Թոֆիգ Զուլֆուգարովը հայտարարել է, որ այժմ Ղարաբաղի ռուս խաղաղապահների վերահսկողության գոտուց հայ բնակչության արտահոսքի միտում է նկատվում։

Ինչպես հաղորդում է Caliber.Az-ը, այս մասին նա հայտարարել է «Modern Talking-Ժամանակակից զրույց»-ի YouTube ալիքին տված հարցազրույցում։

«Վերաինտեգրման գործընթացն, ըստ էության, արդեն ընթացքի մեջ է, որովհետև հստակ տեսանելի է հայ բնակչության արտահոսքն այդ գոտուց։ Ակնհայտ է, որ մեկնողների մի մասը որոշում է կայացրել չապրել Ադրբեջանում՝ ադրբեջանական պետությունում։ Նրանք, ովքեր մնացել են, ակնհայտորեն պատրաստ են ինտեգրվել ադրբեջանական իրավական, տնտեսական և քաղաքական տարածքին։

Իրավիճակի շատ արագ կարդինալ փոփոխություն ակնկալել չարժե, քանի որ այսօր Ադրբեջանի համար առաջնահերթությունը բնակչության գործնական վերադարձն է ազատագրված տարածքներ։ Այսօրվա դրությամբ դա ավելի նշանակալից և կարևոր աշխատանք է։ Եվ ես վստահ եմ, որ շատ շուտով, այն բանից հետո, երբ խաղաղապահ ուժերի պատասխանատվության գոտու հարևանությամբ հայտնվեն քաղաքացիներ, հայտնվեն ադրբեջանական պետության ենթակառուցվածքներ, այնքան շուտ կսկսվի այդ գոտին ադրբեջանական պետությանը վերադարձնելու և ինտեգրելու գործընթացը», - ասել է նախկին նախարարը։

Նրա խոսքով, հայ բնակչության արտահոսքը Ղարաբաղից հնարավոր չէ կասեցնել որևէ քայլով, որոնք ձեռնարկում է Ռուսաստանը։

«Որովհետև մարդիկ այնտեղ շատ լավ հասկացել են, որ իրենք քաղաքական խաղերի պատանդ են։ Իսկ շարքային հայերը ադրբեջանցիներից չեն վախենում: Նրանք մտավախություն ունեն, որ իրենց նորից կօգտագործեն ինչ-որ քաղաքական խաղերում։ Եվ, բնականաբար, նրանք ցանկանում են իրենց երեխաների համար ստեղծել կայուն ապագա։ Դրա համար էլ հնարավոր չէ կասեցնել այդ արտահոսքը»,- ասել է Թոֆիգ Զուլֆուգարովը։