Պաշտոնական Բաքուն խաղաղության կոչ է անում Երևանին
«Բոլորովին անհիմն է, որ «Արևմտյան Ադրբեջանի համայնքի» ներկայացուցիչների անվտանգ և արժանապատիվ վերադարձի ցանկությունը հայրենի հողեր և նրանց կողմից անցկացվող քարոզչությունն այս ուղղությամբ՝ Հայաստանի վարչապետի կողմից որակվել է որպես «ագրեսիայի նախապատրաստում» Հայաստանի դեմ»:
Ինչպես հայտնում է Caliber.Az-ը, այս մասին հայտարարել է Ադրբեջանի ԱԳՆ մամուլի քարտուղար Այխան Հաջիզադեն՝ մեկնաբանելով Հայաստանի վարչապետ Նիկոլ Փաշինյանի ելույթը ԵԱՀԿ Խորհրդարանական վեհաժողովի նստաշրջանում։
«Կոչ ենք անում հայկական կողմին, որը շարունակում է իր ագրեսիվ զրպարտիչ հռետորաբանությունը մեր երկրի դեմ՝ օգտագործելով տարբեր միջազգային հարթակներ, հրաժարվել խաղաղ հեռանկարներին վնասող հայտարարություններից և օգտագործել ստեղծված պատմական հնարավորությունները՝ Հարավային Կովկասը վերածելու խաղաղության և համագործակցության տարածքի։
Հուսով ենք, որ Հայաստանը ադեկվատ կարձագանքի Ադրբեջանի կոչերին՝ կապված Ադրբեջանի և Հայաստանի միջև հարաբերությունների կարգավորման և մոտ ապագայում խաղաղության պայմանագրի ստորագրման հետ»,- նշել է Ա.Հաջիզադեն։