Ալիևը ծանոթացել է «Խագանի» այգում բարեկարգման աշխատանքներից հետո ստեղծված պայմաններին

Ադրբեջանի նախագահ Իլհամ Ալիևը սեպտեմբերի 14-ին ծանոթացել է Բաքվի Սաբայիլի շրջանի «Խագանի» այգում և հարակից տարածքներում իրականացված բարեկարգման և վերակառուցման աշխատանքներից հետո ստեղծված պայմաններին։

Ինչպես հաղորդում է Caliber.Az-ը, այս մասին տեղեկությունը զետեղված է ԱՀ ղեկավարի պաշտոնական կայքում։

Բաքվի գործադիր իշխանության ղեկավար Էլդար Ազիզովը երկրի ղեկավարին տեղեկացրել է այգում իրականացված աշխատանքների մասին։ Նրա խոսքով, «Խագանի» այգու տարածքն ընդլայնվել է, Ռասուլ Ռզա, Գոգոլի և Խագանի փողոցների մոտակա ճանապարհները վերացվել են, և այս վայրը դարձել է հետիոտների համար գոտի։

1,4 հա ընդհանուր մակերեսով այգու տարածքում իրականացվել են կանաչապատման աշխատանքներ, տեղադրվել են նոր լուսավորման սարքեր և նստարաններ, ստեղծվել է մանկական ժամանցի գոտի, իսկ հարակից բնակելի շենքերում կատարվել են վերանորոգման և վերականգնման աշխատանքներ։

«Խագանի» այգու բացումը «Ֆորմուլա 1»-ի Ադրբեջանի Գրան պրիի անցկացման շրջանում և ՄԱԿ-ի Կլիմայի փոփոխության մասին շրջանակային կոնվենցիայի Կողմերի 29-րդ նստաշրջանի (COP29) նախաշեմին մեծ ներդրում կունենա Բաքվում զբոսաշրջիկների հանգստի արդյունավետ կազմակերպման գործում։