Զանգեզուրի միջանցքի բացման դեպքում Ադրբեջանը կդառնա Եվրասիական լոգիստիկայի առանցքային խաղացող. փոխնախարար

«Եթե Զանգեզուրի միջանցքը բացվի երկրի տարածքային ամբողջականությունն ապահովելուց հետո, Ադրբեջանը կդառնա Եվրասիական լոգիստիկայի առանցքային խաղացող»:

Ինչպես հայտնում է Caliber.Az-ը, այս մասին հայտարարել է Ադրբեջանի թվային զարգացման և տրանսպորտի փոխնախարար Ռահման Հումմեթովը «Զրո արտանետումներով ծով, բեռնային լոգիստիկա և տրանսպորտ» թեմայով պանելային քննարկումների ժամանակ։

Փոխնախարարը նշել է, որ Զանգեզուրի միջանցքը դառնալու է Եվրոպայի, Կենտրոնական Ասիայի և Չինաստանի միջև ամենակարճ և անվտանգ տարանցիկ ուղին. «Ներդրումներ կատարելով ռազմավարական ենթակառուցվածքներում՝ Ադրբեջանը կարևոր քայլեր է կատարում իր տարածքով անցնող տրանսպորտային երթուղիների վերափոխման առումով։ Որպես օրինակ նշում եմ, որ 2019-2023 թվականներին Ադրբեջանի տարածքով փոխադրվող տարանցիկ բեռների ծավալը 5,7 մլն տոննայից հասել է 13,4 մլն տոննայի։ Ադրբեջանը և նրա գործընկերները հավատարիմ են Միջին միջանցքի ողջ երկայնքով «կանաչ փոխակերպման» նախաձեռնություններին»: