Այդըն Քերիմով. Շուշայում վերաբնակեցումը կսկսվի 2024 թվականի փետրվար-մարտ ամիսներին

Ադրբեջանի քաղաքացիների վերաբնակեցումը Շուշա կսկսվի 2024 թվականի փետրվար-մարտ ամիսներին։ Նախատեսվում է վերաբնակեցնել ավելի քան 300 ընտանիք։

Այս մասին Ազերթաջին տված հարցազրույցում ասել է՝ Շուշայի շրջանում Ադրբեջանի նախագահի հատուկ ներկայացուցիչ Այդըն Քերիմովը։

«Շուշա քաղաքի փողոցները հիմնովին վերակառուցվելու են, ջրի ու գազի և էլեկտրահաղորդման գծերը կանցկացվեն գետնի տակով։ Ներքին ճանապարհային ցանցի առաջին 17 կիլոմետրանոց հատվածի շինարարությունը՝ 56 կիլոմետր ընդհանուր երկարությամբ, կսկսվի 2024 թվականին։ Ներքին ճանապարհային ցանցի վերակառուցման նախագծին զուգահեռ՝ կբարելավվի հասարակական տրանսպորտի համակարգը։ Հաշվի առնելով, որ Շուշան հանդիսանում է հարուստ պատմությամբ արգելոց, այստեղ գործելու են հիմնականում փոքր տրամաչափի ավտոմեքենաներ, մարդատար էլեկտրական ավտոբուսներ։

Ինչ վերաբերում է բնակարանաշինությանը, ապա 23 շենք ունեցող բնակելի համալիրի շինարարական աշխատանքներն ամբողջությամբ կավարտվեն՝ հաջորդ տարվա առաջին եռամսյակում։ Ընդհանուր առմամբ, բնակելի համալիրը կունենա 450 բնակարան։ Բնակարանների մեծ մասը տրամադրվելու է նախկին նախկին հարկադիր վերաբնբակներին»,- ասել է Այդըն Քերիմովը։