Այս ամիս երկու ուղղություններով՝ Լաչին-Խանքենդի ճանապարհն օրական անարգել հատել է 30 մեքենա

«Այսօր ևս մեկ անգամ ուզում ենք ասել, որ Ադրբեջանը Լաչինի ճանապարհով մեքենաների տեղաշարժի համար որևէ սահմանափակում չի մտցրել։ Ակցիայի մասնակիցները ցանկություն չունեն փակել ճանապարհով երթևեկությունը։ Սոցցանցերում տարածված նորություններն ու տեսանյութերը ցույց են տալիս, որ ճանապարհով անարգել անցնում են տարբեր տրանսպորտային միջոցներ, այդ թվում՝ քաղաքացիական, շտապօգնության և ԿԽՄԿ մեքենաներ»:

Ինչպես հաղորդում է Caliber.Az-ը, այս մասին ԵԱՀԿ Մշտական խորհրդի արտահերթ նիստում հայտարարել է՝ կազմակերպությունում Ադրբեջանի մշտական ներկայացուցիչ Ռովշան Սադըգբեյլին՝ ի պատասխան Հայաստանի արտգործնախարար Արարատ Միրզոյանի ելույթի։

«Իրավիճակի ենթադրյալ մարդասիրական հետևանքների մասին պնդումները նույնպես կեղծ են։ Սա ոչ այլ ինչ է, քան հերթական դրսևորում այն բանի, որ Հայաստանը շահարկում է իրավիճակը ակնհայտ չարամիտ քաղաքական նպատակներով։ Տեղի բնակիչներին ապրանքների մատակարարման կամ առաջին անհրաժեշտության բժշկական ծառայությունների մատուցման համար խոչընդոտներ չկան։ Այդուհանդերձ, Ադրբեջանի կառավարությունը լրջորեն է վերաբերվել իրավիճակի հնարավոր բացասական հետևանքներին և վերջին շաբաթների ընթացքում մի քանի անգամ հայտարարել է, որ պատրաստ է տեղում լուծել հայազգի մեր քաղաքացիների ցանկացած մարդասիրական խնդիր։ Բողոքի խաղաղ ցույցերի մեկնարկի օրվանից՝ 2022 թվականի դեկտեմբերի 12-ից մինչև 2023 թվականի հունվարի 15-ը, ռուսական խաղաղապահ կոնտինգենտի, ԿԽՄԿ-ի և տեղի հայերի ընդհանուր առմամբ 644 մեքենաներ երկու ուղղություններով անարգել անցել են Լաչինի ճանապարհով։ 2023 թվականի հունվարի 5-ից հունվարի 15-ը օրական երկու ուղղություններով անցել են միջինը 30 մեքենաներ։ Դրանց մեծ մասը Խանքենդի սննդամթերք և դեղորայք տեղափոխող մեծ տարողությամբ մեքենաներ էին»,- նշել է մշտական ներկայացուցիչը։