Իլհամ Ալիև. Ոչ ոք չի կարող օրենքից վեր լինել

«Մարդկանց հուզող խնդիրների լուծումը պետք է լինի առաջին պլանում թե՛ Բաքվում, թե՛ մարզերում»։

Ինչպես հայտնում է Caliber.Az-ը, այս մասին հայտարարել է Ադրբեջանի նախագահ Իլհամ Ալիևը Բաքվի Նիզամիի, Նարիմանովի շրջանների և Քյուրդամիրի շրջանի գործադիր իշխանությունների նորանշանակ ղեկավարներ Ջոշգուն Ջաբրայիլովին, Էլգին Հաբիբուլլաևին և Էլխան Իբրահիմովին տեսակապի ձևաչափով ընդունելու ժամանակ:

«Ցավոք, որոշ դեպքերում իմ կողմից նշանակված պաշտոնյաները իրենց պարտականությունները կատարելու փոխարեն զբաղվել են անօրինական գործունեությամբ, կոռուպցիայով և կաշառակերությամբ։ Նրանք յուրացրել են պետական և հասարակական աշխատանքներում ներգրավված անձանց աշխատավարձերը։ Այս անբարոյականությունն աննկատ չմնաց։ Ինչպես գիտեք, մի շարք գործադիր իշխանությունների ղեկավարներ քրեական պատասխանատվության են ենթարկվել, նրանցից շատերն արդեն դատապարտվել են, իսկ ոմանց նկատմամբ քրեական գործը դեռ շարունակվում է։

Դա վերաբերում է ոչ միայն գործադիր իշխանությունների ղեկավարներին, այլև բոլոր պաշտոնյաներին։ Ոչ ոք օրենքից վեր չէ: Օրենքի առաջ բոլորը հավասար են»,- ասել է նախագահը։