Ուզբեկստանի նախագահի մամուլի ծառայությունը հաստատել է նրա մասնակցությունը Շուշայում ԹՊԿ գագաթնաժողովին

Ուզբեկստանի նախագահ Շավքաթ Միրզիյոևը հուլիսի 5-6-ը կայցելի Ադրբեջան, որտեղ կմասնակցի Թյուրքական պետությունների կազմակերպության ոչ պաշտոնական գագաթնաժողովին։

Ըստ Report-ի՝ այս մասին հայտնել են Ուզբեկստանի ղեկավարի մամուլի ծառայությունից։

Ադրբեջանի նախագահ Իլհամ Ալիևի նախաձեռնությամբ կազմակերպված գագաթնաժողովին կմասնակցեն նաև Թուրքիայի, Ղազախստանի և Ղրղզստանի ղեկավարները։ Միջոցառմանը նախատեսվում է նաև դիտորդ երկրների ղեկավարների և ԹՊԿ-ի գլխավոր քարտուղարի մասնակցությունը:

Գագաթնաժողովի արդյունքներով նախատեսվում է Ղարաբաղյան հռչակագրի, ինչպես նաև մի շարք այլ կարևոր փաստաթղթերի ստորագրում։ Գագաթնաժողովից առաջ տեղի կունենա ԹՊԿ-ի արտաքին գործերի նախարարների խորհրդի նիստ։