Իրան. Օտարերկրյա զորքերի մուտքը Հարավային Կովկաս չի նպաստում կայունության հաստատմանը

Իրանը միշտ ընդգծել է, որ օտարերկրյա զորքերի մուտքը Հարավային Կովկաս չի նպաստում անվտանգության ու կայունության հաստատմանը և տարածաշրջանի ժողովուրդների շահերի ապահովմանը։

Այս մասին այսօր Թեհրանում հայտարարել է՝ Իրանի ԱԳՆ պաշտոնական ներկայացուցիչ Նասեր Քանանին, գրում է Mehr-ը։

Նրա խոսքով, Հարավային Կովկասի անվտանգությունը Իրանի կարևորագույն առաջնահերթություններից է։ Հարավային Կովկասի անվտանգությունն ազդում է ողջ տարածաշրջանի անվտանգության վրա, հավելել է նա։

Քանանին հայտարարել է, որ Իրանի ռազմավարությունն է բանակցություններ վարել և բազմակողմ երկխոսություն՝ օգտագործելով առկա մեխանիզմները՝ լուծելու տարաձայնությունները և հաստատել խաղաղություն, կայունություն և անվտանգություն Հարավային Կովկասում. «Հարավային Կովկասում միլիտարիզմի ուժեղացմանն ուղղված ցանկացած մոտեցում կբարդացնի տարածաշրջանի անվտանգության իրավիճակը և կվնասի տարածաշրջանում խաղաղ գործընթացին, և Իրանը դա չի ընդունի։ Տարածաշրջանի երկրները չեն ցանկանում ստեղծել մեխանիզմներ, որոնք կբարդացնեն իրավիճակը տարածաշրջանում»։