Վրաստանը գումար կգանձի Ադրբեջանից Հայաստան վառելիքի տարանցման համար

Վրաստանը գումար կգանձի Ադրբեջանից Հայաստան նավթամթերքի երկրորդ տարանցման համար։

Ինչպես հաղորդում է Caliber.Az-ը՝ հղում անելով վրացական լրատվամիջոցներին, այս մասին հայտարարել է Mega Trade-ի տնօրեն Կարեն Այրիյանը։

Նրա խոսքով՝ առաջիկա ներմուծման ընթացքում Ադրբեջանից Հայաստան կբերվի ոչ միայն Premium տեսակի, այլ նաև Regular տեսակի բենզին։ Ներմուծումն իրականացվելու է Վրաստանի տարածքով տարանցման միջոցով, ինչի համար այս անգամ կգանձվի համապատասխան վճար։

Այրիյանը նշել է, որ տարանցման վճարի կիրառումը էական ազդեցություն չի ունենա վառելիքի վերջնական գնի վրա։ Նրա գնահատմամբ՝ բենզինի գնի ձևավորման վրա առավել մեծ ազդեցություն ունեն արտարժույթի փոխարժեքների տատանումները և համաշխարհային շուկաներում նավթամթերքների գները։

Ավելի վաղ Հայաստանի էկոնոմիկայի նախարար Գևորգ Պապոյանը հայտնել էր, որ երկիրը Վրաստանից բավականին բարենպաստ գին է ստացել Ադրբեջանից բեռների տարանցման համար։

Վարչապետ Իրակլի Կոբախիձեի կարգադրությամբ Վրաստանը վառելիքի առաջին փոխադրումն իրականացրել է անվճար։