«Հրապարակ». Փաշինյանը հրաժարվել է հանդիպել Քիշնևի հայ համայնքի հետ

Մայիսի 31-ին Մոլդովայի մայրաքաղաք ժամանած Հայաստանի վարչապետ Նիկոլ Փաշինյանը չեղարկել է Քիշնևի հայ համայնքի հետ հանդիպումը։

Caliber.Az-ի փոխանցմամբ՝ այս մասին «Հրապարակ» թերթին ասել է Քիշնևի հայ համայնքի ղեկավար Վեներա Մուշեղը։

Մուշեղի խոսքով՝ հանդիպումը պետք է կայանար հունիսի 2-ին։

Նա նշել է, որ տեղյակ չէ հանդիպման չեղարկման պատճառի մասին, սակայն որոշ մանրամասներ է ներկայացրել։

«Հանդիպման մասնակիցների ցուցակում առաջինը իմ անունն էր՝ որպես սփյուռքի ղեկավար։ Բայց հետո անվանս վրա գիծ են քաշել ու հայտարարել, որ ես չպետք է ներկա գտնվեմ միջոցառմանը։ Ես պատասխանեցի, որ ես այստեղ ներկայացնում եմ հայությունը, և ես հարցեր ունեմ նրան (Հայաստանի վարչապետին - խմբ.)։ Ինչո՞ւ չպետք է մասնակցեմ»,- ասել է Մուշեղը։

Քիշնևի հայ համայնքի ղեկավարի խոսքով՝ նա զգուշացրել է, որ ոչ ոք չպետք է փորձի կանգնեցնել իրեն, նույնիսկ եթե ինչ-որ մեկն անընդունելի է համարում իր մասնակցությունը հանդիպմանը։

«Մոտ մեկ ժամ առաջ ինձ զանգահարեցին և ասացին, որ հանդիպում չի լինելու»,- հավելել է նա։