Թեհրանը պատրաստ է հարթակ դառնալ Բաքվի և Երևանի միջև բանակցությունների համար Դեսպանի հայտարարությունը

Ադրբեջանում Իրանի դեսպան Սեյեդ Աբբաս Մուսավին հայտարարել է Բաքվի և Երևանի միջև բանակցությունների հարթակ դառնալու Թեհրանի պատրաստակամության մասին։

«Իրանը պատրաստ է օգնել իր հյուսիսային հարևաններին՝ Ադրբեջանին և Հայաստանին, հասնելու կայուն խաղաղության երկկողմ և եռակողմ հանդիպումների, ինչպես նաև 3+3 տարածաշրջանային նախաձեռնության շրջանակներում», - ասել է Մուսավին Ադրբեջանի առաջին փոխնախագահի օգնական Էլչին Ամիրբեկովի հետ հանդիպմանը:

Մուսավիի խոսքերը մեջբերում է իրանական IRNA գործակալությունը։

Նշվում է, որ կողմերը քննարկել են երկկողմ հարաբերությունների վերջին զարգացումները, Կովկասում տիրող իրավիճակը և «տարածաշրջանին առնչվող հարցերի շուրջ Իրանի սկզբունքային դիրքորոշումը»։

Մուսավին վերահաստատել է Իրանի դիրքորոշումը միջազգայնորեն ճանաչված սահմանների անփոփոխության վերաբերյալ և հայտարարել, որ «տարածաշրջանում Իրանի կենսական և երկարաժամկետ շահերին չհամապատասխանող աշխարհաքաղաքական փոփոխություններ չպետք է լինեն», գրում է IRNA-ն։