Ադրբեջանում արգելվել է շիկացման լամպերի վաճառքը 2026 թվականից

Ադրբեջանի նախագահ Իլհամ Ալիևը հաստատել է «Էներգետիկ ռեսուրսների ռացիոնալ օգտագործման և էներգաարդյունավետության բարձրացման մասին» օրենքում փոփոխություններ կատարելու մասին օրինագիծը։

Ինչպես հաղորդում է Caliber.Az-ը, այս մասին տեղեկատվությունը զետեղված է պետության ղեկավարի պաշտոնական կայքում։

Փաստաթղթի համաձայն՝ Ադրբեջանում կարգելվի փոփոխական հոսանքի շղթաներում լուսավորության համար օգտագործվող շիկացման էլեկտրական լամպերի ներմուծումը, արտադրությունը և վաճառքը, բացառությամբ արտադրական գործընթացներում օգտագործելու համար հատուկ նախատեսված շիկացման լամպերի և այն արտադրանքի, որոնց հիմնական նշանակությունը լուսավորությունը չէ։

2026 թվականի հունվարի 1-ից կարգելվեն 60 Վտ և ավելի հզորությամբ շիկացման լամպերը, իսկ 2026 թվականի հուլիսի 1-ից՝ 25 Վտ-ից մինչև 60 Վտ հզորությամբ շիկացման լամպերը։