Կրեմլը հրաժարվել է մեկնաբանել AZAL-ի ինքնաթիռի կործանման հետաքննության մասին հաշվետվությունը

Կրեմլը չի մեկնաբանում Ղազախստանի տրանսպորտի նախարարության նախնական զեկույցը «Ադրբեջանական ավիաուղիների» (AZAL) ինքնաթիռի կործանման հետաքննության վերաբերյալ, ՏԱՍՍ-ին հայտնել է ՌԴ նախագահի մամուլի քարտուղար Դմիտրի Պեսկովը։

«Սա նախնական զեկույց է։ Իհարկե, մեր համապատասխան գերատեսչություններն այն կուսումնասիրեն մեծ ուշադրությամբ, պատշաճ ուշադրությամբ։ Ռուսաստանի նախագահի աշխատակազմի կողմից այս թեման մեկնաբանելն անհնար է, մենք դա հնարավոր չենք համարում»,- ասել է Պեսկովը։

Հիշեցնենք, որ երեկ Ղազախստանի Հանրապետության կառավարական հանձնաժողովը, որն ուսումնասիրում է Բաքու-Գրոզնի երթուղով J2-8243 չվերթն իրականացնող «Ադրբեջանական ավիաուղիներ»-ի Embraer 190 ինքնաթիռի վթարի պատճառները, ներկայացրել է նախնական զեկույց 2024 թվականի դեկտեմբերի 25-ին Ակտաու քաղաքի մոտ տեղի ունեցած ողբերգության մասին: