Բերդըմուհամեդովը շնորհավորել է Ի.Ալիևին երկրի՝ «Կենտրոնական Ասիա + Ադրբեջան» ձևաչափին միանալու կապակցությամբ

Թուրքմենստանի նախագահ Սերդար Բերդըմուհամեդովը շնորհավորել է Ադրբեջանի նախագահ Իլհամ Ալիևին երկրի՝ Կենտրոնական Ասիայի խորհրդատվական հանդիպումներին որպես լիիրավ մասնակից միանալու կապակցությամբ։
 
Report-ի փոխանցմամբ, այս մասին նա հայտարարել է՝ «Կենտրոնական Ասիա + Ադրբեջան» ձևաչափով պետությունների ղեկավարների 7-րդ խորհրդատվական հանդիպման ժամանակ։
 
«Ես նաև կցանկանայի շնորհավորել Իլհամ Հեյդարովիչ Ալիևին՝ մեր ձևաչափին որպես լիիրավ անդամ միանալու կապակցությամբ», - ասել է նա։
 
Բերդըմուհամեդովը նշել է, որ անվտանգության հարցերը առաջնահերթություն են հանդիսանում Կենտրոնական Ասիայի երկրների համագործակցության համար։ Բացի այդ,  տարածաշրջանի երկրների հսկայական ներուժը պահանջում է համագործակցության հետագա զարգացում, մասնավորապես՝ ռազմավարական առումով կարևոր ոլորտներում, ինչպիսիք են տրանսպորտը, էներգետիկան, առևտուրը, արտադրական և տեխնոլոգիական կոոպերացիան։
 
Բերդըմուհամեդովի խոսքով՝ Կենտրոնական Ասիան այսօր համարվում է միջազգային նշանակության տրանսպորտային և տարանցիկ միջանցք։