ՌԴ ԱԳՆ-ում հուսով են, որ Հայաստանի հասարակությանը կբացատրեն՝ ԵԱՏՄ-ին անդամակցության օգուտներն ու կորուստների ծավալը

Ռուսաստանը հուսով է, որ հայ հասարակությանը կբացատրեն՝ ԵԱՏՄ-ին Հայաստանի անդամակցության բոլոր օգուտները և Միության հետ խզման կորուստների մասշտաբները։
 
Ինչպես տեղեկացնում է Caliber.Az-ը, այս մասին ռուսական ԶԼՄ-ներին հայտնել է՝ ՌԴ ԱԳՆ փոխղեկավար Միխայիլ Գալուզինը։
 
«Պաշտոնական Երևանը պետք է որոշի, թե որտեղ է ավելի լավ լինել: Հուսով ենք, որ ԵԱՏՄ-ին անդամակցության բոլոր օգուտները և ԵԱՏՄ-ի հետ խզման կորուստների մասշտաբները կբացատրվեն հայ հասարակությանը, որպեսզի հայ հասարակությունն օբյեկտիվ պատկերացում ունենա իրականության մասին»,- նշել է փոխնախարարը։
 
Նրա խոսքով, հնարավոր չէ միաժամանակ լինել երկու հակադիր միավորումներում.
 
Գալուզինն ընդգծել է, որ ԵԱՏՄ-ն հավասար պետությունների  միավորում է, մինչդեռ ԵՄ-ն մի կառույց է, որտեղ «կա լրիվ կարգապահություն՝ ստորադասված հակառուսական նարատիվներին, որոնք շարադրում են իրականությունից կտրված բրյուսելյան բյուրոկրատները»։