Ռուսաստանի ԱԳՆ-ն՝ «Թրամփի ուղու» մասին

Ռուսաստանը կկարողանա քննարկել ավելի վաղ ԱՄՆ-ում համաձայնեցված՝ Հայաստանի և Ադրբեջանի տարածքների միջև տրանսպորտային միջանցքը («Թրամփի ուղի»), երբ տեսնի դրա նախագիծը։
 
Ինչպես հաղորդում է ՏԱՍՍ-ը, այս մասին ճեպազրույցի ժամանակ հայտարարել է՝ Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան։
 
«Ես կցանկանայի ընդգծել, որ մենք կկարողանանք վերջնական պատկերացում կազմել, թե ինչպես է այս տրանսպորտային երթուղին գործնականում գործելու, երբ ծանոթանանք այս նախագծի կոնկրետ մանրամասներին։ Առայժմ դա տեղի չի ունեցել», - ասել է նա։
 
Զախարովան նաև ընդգծել է, որ Հարավային Կովկասի գործերում ոչ տարածաշրջանային խաղացողների մասնակցությունը, այդ թվում՝ հաղորդակցությունների ապաշրջափակման հարցում, պետք է  կողմնորոշվի հիմնականում տարածաշրջանի երկրների և նրանց անմիջական հարևանների շահերով։
 
Բացի այդ, շարունակել է դիվանագետը, անհրաժեշտ է հաշվի առնել մի շարք լրացուցիչ գործոններ։ Զախարովան հավելել է, որ Հայաստանը ԵԱՏՄ միասնական մաքսային տարածքի մաս է կազմում, Հարավկովկասյան երկաթուղին «Ռուսական երկաթուղիների» դուստր ձեռնարկությունն է, իսկ ռուս սահմանապահները, միջազգային պայմանագրի համաձայն, ապահովում են սահմանների պաշտպանությունը այն տարածքում, որտեղով ենթադրաբար անցնելու է վերոնշյալ երթուղին։