Ադրբեջանցի զինվորականները մասնակցում են պաշտպանական ցուցահանդեսի՝ «Nusret-2025» զորավարժությունների շրջանակներում

Թուրքիայում՝ Չանաքքալեում և Սարոսի ծոցում անցկացվող «Nusret-2025» միջազգային զորավարժությունների շրջանակներում, որոնց մասնակցում են նաև ադրբեջանցի զինվորականներ, Նարա ամրոցում անցկացվել են պաշտպանական արդյունաբերության ընկերությունների ցուցահանդեսներ և շնորհանդեսներ։

Report-ի փոխանցմամբ՝ այս մասին հայտարարել են Թուրքիայի ազգային պաշտպանության նախարարությունում։

Նշվում է, որ  «Nusret-2025» միջազգային զորավարժությունները Թուրքիայի Ռազմածովային ուժերի հրամանատարության ղեկավարությամբ տեղի են ունենում հոկտեմբերի 24-ից 31-ը՝ բարեկամ և դաշնակից երկրների մասնակցությամբ։

Զորավարժությունների նպատակն է բարելավել մասնակից ստորաբաժանումների և հրամանատարությունների գիտելիքներն ու հմտությունները ականային մարտերի պլանավորման, իրականացման և գնահատման գործում, ինչպես նաև զարգացնել փոխադարձ համագործակցությունը և համատեղ գործառնական կարողությունները Թուրքիայի Ռազմածովային ուժերի և բարեկամ և դաշնակից երկրների Ռազմածովային ուժերի միջև։