Աստրախանի մարզում գրանցված է ադրբեջանական 19 ընկերություն

2011 թվականին Ռուսաստանի Դաշնության Աստրախանի մարզի և Ադրբեջանի կառավարության միջև՝ առևտրատնտեսական, գիտատեխնիկական և մշակութային համագործակցության մասին համաձայնագիր է ստորագրվել։ Այս տարի Աստրախանի մարզի և Ադրբեջանի Հանրապետության միջև՝ 2024-2026 թթ. փոխադարձ համագործակցության ընդլայնման ծրագիր է ընդունվել:
 
Ինչպես հայտնում է AZERTAC-ը՝ Աստրախանի մարզի արտաքին կապերի նախարար Վլադիմիր Գոլովկովին հղումով, նշված ծրագիրը ներկայումս իրագործվում է։
 
Անդրադառնալով առևտրատնտեսական հարաբերություններին՝ նախարարն ընդգծել է, որ Աստրախանի մարզից Ադրբեջան արտահանվում է հիմնականում ձուկ ու ձկնամթերք, նավաշինական նյութեր, աղ, կահույք, էլեկտրական տեխնիկա։ Ադրբեջանից Աստրախանի  մարզ են ներկրվում՝ տարբեր նպատակների համար նախատեսված խողովակներ, միրգ ու բանջարեղեն, էլեկտրական սարքավորումներ։
 
2023-2024 թվականների ընթացքում Աստրախանի  մարզի ձեռնարկատերերը՝ 670 հազար դոլար արժողությամբ 10 պայմանագիր են կնքել Ադրբեջանի համապատասխան կառույցների հետ։ Այդ համաձայնագրերի հիման վրա Ադրբեջան է մատակարարվել ձկնաբուծության և սննդի արդյունաբերության արտադրանք։
 
Աստրախանի մարզում գրանցված է Ադրբեջանին պատկանող 19 ընկերություն։ Այս ընկերությունները գործում են մեծածախ առևտրի, տրանսպորտի, նավաշինության ոլորտներում։ Ինչպես տեղերում, այնպես էլ տարածաշրջանում ներդրումներ կատարող ադրբեջանցի ձեռներեցները սերտորեն համագործակցում են՝ Աստրախանում գործող Ադրբեջանական բիզնես կենտրոնի հետ, որտեղ նրանք էլ ավելի են ընդլայնում իրենց գործունեության շրջանակը՝ տարբեր ցուցահանդեսների, հանդիպումների, ֆորումների և այլ միջոցառումների անցկացման շնորհիվ: