Դուրովի ընկերուհուց ստացված տեղեկությունը կարող էր նրան բերման ենթարկելու պատճառ դառնալ

Շաբաթ երեկոյան ոստիկանությունը Փարիզի Լե Բուրժե օդանավակայանում ձերբակալել է Telegram-ի հիմնադիր Պավել Դուրովին՝ Ադրբեջանից նրա ժամանելուց հետո։ Ձերբակալության պատճառը կարող էր լինել նրա ընկերուհուց ստացված տեղեկությունը, որը բացահայտել էր Դուրովի աշխարհագրական դիրքը և նրա Ֆրանսիա ժամանելու պլանները։

Ըստ Daily Mail-ի՝ Դուրովին ձերբակալել են անձնական ինքնաթիռից իջնելուն պես։ Նրան մեղադրել են՝ իշխանությունների հետ համագործակցությունից հրաժարվելու, մանկական պոռնոգրաֆիայի տարածմանը մեղսակցության, թմրամիջոցների ապօրինի շրջանառության, ինչպես նաև կազմակերպված խմբի կազմում խարդախության  մեջ:
 
«Սակայն ասում են, որ  օդանավում մի աղջիկ է եղել՝ ռուսաստանցի  Յուլիա Վավիլովան, որին անվանում են Դուրովի սիրելին։ 24-ամյա շիկահեր ռուսուհին ապրում է Դուբայում, և նա ուղեկցել է նրան՝ շրջագայության ժամանակ նախկին խորհրդային հանրապետություններով, այդ թվում՝ Ղազախստանում և Ղրղզստանում, ինչպես նաև Ադրբեջանում:
 
Աղջիկը հրապարակել է բոլոր աշխարհագրական դիրքերը Instagram-ում և փաստացի զգուշացրել է Ֆրանսիայի իշխանություններին՝ Դուրովի Փարիզ ժամանելու մասին։ Ոստիկաններին  մնացել է միայն սպասել, որ նա վայրէջք կատարի։
 
Սա ստիպել է դավադրության տեսաբաններին ենթադրել, որ Վավիլովան Մոսադի գործակալ է, որը «մեղրի ծուղակում» առաքելություն է իրականացնում՝ նրան արևմտյան հետախուզական գործակալությունների ձեռքը հանձնելու համար:
 
Ի վերջո, իրավապահ մարմիններին Telegram-ին հասանելիություն տալը թույլ կտա նրանց ստանալ տեղեկատվություն, որը կարող է անգնահատելի լինել հանցագործներին հետևելու համար՝ ահաբեկիչներից մինչև մանր ավազակները»,- գրում է հրատարակությունը: