Կանադական լրատվամիջոցներ. Տորոնտոյում գողացել են Ադրբեջանի դրոշը

Հուլիսի վերջին Կանադայում գտնվող Ադրբեջանի տան ճակատային մասից գողացել են ադրբեջանական դրոշը: Կազմակերպությունը միջադեպը որակել է ատելության հողի վրա հանցագործություն և հայտնել Տորոնտոյի ոստիկանությանը:

Այս մասին հաղորդում է Caliber.Az-ը՝ հղում անելով կանադական Thej.ca կայքին:

Ադրբեջանի տան գրասենյակը հայտարարել է, որ գողությունը և դրան ուղեկցող վանդալիզմը տեղի են ունեցել Բաքվի և Երևանի միջև խաղաղության գործընթացի մասին տեղեկատվության առցանց հրապարակումից կարճ ժամանակ անց: Կազմակերպությունը հայտարարել է, որ գողության ժամանակը վկայում է քաղաքական դրդապատճառի մասին և կոչ է արել ականատեսներին դիմել ոստիկանություն: Ադրբեջանի տունը կոչ է արել միջադեպի մասին տեղեկատվություն կամ տեսանյութ ունեցող յուրաքանչյուրին կապ հաստատել քննիչների հետ: Կազմակերպությունը գողությունը բնութագրել է որպես նպատակային գործողություն, որը վնասում է տեղի ադրբեջանական սփյուռքին և սպառնում քաղաքացիների անվտանգությանը:

Վերջին ամիսներին Տորոնտոյում նկատվում է լարվածության աճ՝ կապված միջազգային հակամարտությունների հետ:

Համայնքի ղեկավարներն ու դիտորդները նշել են, որ Ադրբեջանի տան գողությունը չի կարող դիտարկվել առանձին: Ադրբեջանն ու Իսրայելը պահպանում են ամուր ռազմավարական և տնտեսական կապեր, այդ թվում՝ համագործակցություն էներգետիկայի և պաշտպանության ոլորտներում, ինչը գրավել է Կանադայի հրեական համայնքների ուշադրությունը։ Այս կապերը նշանակում են, որ ադրբեջանական հաստատությունների դեմ ուղղված գործողությունները երբեմն մտահոգություն են առաջացնում իսրայելամետ խմբերի շրջանում, որոնք տարակուսում են, որ դրանցում կարող են ներգրավված լինել հակաիսրայելական ուժեր։