Եկատերինբուրգի ադրբեջանական համայնքի ղեկավար Մուստաֆաևը կասկածվում է յուրացման մեջ

Եկատերինբուրգի ադրբեջանական համայնքի ղեկավար Վիդադի Մուստաֆաևը կասկածվում է՝ Ուրալում գործող «Ագրոպրոդուկտ» ընկերությունից հողամասեր յուրացնելու մեջ։
 
Այս մասին հայտնել է Baza-ն։
 
Հետաքննության վարկածով՝ 2018 թվականին Մուստաֆաևը «Ագրոպրոդուկտ»-ի հետ կնքել է չորս միլիոն ռուբլու վարկային պայմանագիր, սակայն ընկերությունը չի կարողացել մարել վարկը։ Միաժամանակ, Մուստաֆաևը խլել է ընկերության հողամասերը՝ որպես վճարում օգտագործելով կեղծ փաստաթղթեր։
 
Ընդ որում, հողամասերի կադաստրային արժեքը վեց անգամ գերազանցում էր վարկի գումարը։
 
Մուստաֆաևը երեկ երեկոյան ձերբակալվել է իրավապահ մարմինների կողմից։