Քըլըչ. Հայաստանի հետ սահմանի վերաբերյալ շահարկումները դատապարտված են ձախողման

Թուրքիան Ադրբեջանի շահերին հակասող որևէ քայլ չի ձեռնարկի: Հայ-թուրքական սահմանի բացման վերաբերյալ ապատեղեկատվություն տարածելու միջոցով հասարակական կարծիքը շահարկելու փորձերը դատապարտված են ձախողման:

Այս մասին AZERTAC-ին ասել է Ադրբեջանում Թուրքիայի նախկին դեսպան, Թուրքիայում IMZA սոցիալական զարգացման աջակցության հասարակական ասոցիացիայի ներկայացուցիչ Հուլուսի Քըլըչը։

«Կեղծ տեղեկությունների հետևում կանգնած են Թուրքիայի և Ադրբեջանի միասնությամբ և սերտ համագործակցությամբ մտահոգված շրջանակները», - ասել է նախկին դեսպանը:

Հուլուսի Քըլըչը վստահություն է հայտնել, որ ոչ ոք ի վիճակի չէ սեպ խրել երկու եղբայրական երկրների հարաբերություններում։ «Ես առաջարկում եմ Անկարայի և Բաքվի բոլոր թշնամիներին ևս մեկ անգամ ծանոթանալ Շուշայի հռչակագրի տեքստին»,- եզրափակել է Թուրքիայի նախկին դեսպանը։