Ռուսաստանը Կասպից ծովում համատեղ զորավարժություններ անցկացնելու առաջարկ է արել Ադրբեջանին, Իրանին և Ղազախստանին

Ռուսական կողմն առաջարկել է Ադրբեջանին, Իրանին և Ղազախստանին 2026 թվականին Կասպից ծովում համատեղ ռազմածովային զորավարժություններ անցկացնել։

Ըստ «Газета.Ru»-ի, այս մասին տեղեկացնում է Ռուսաստանի պաշտպանության նախարարությունը (ՊՆ)։

Նախարարությունը այս հայտարարությունն արել է Ռուսաստանի, Իրանի, Ղազախստանի և Ադրբեջանի Ռազմածովային ուժերի հրամանատարների Սանկտ Պետերբուրգում կայացած հանդիպումից հետո։

«Ռուսական կողմն առաջարկել է 2026 թվականին անցկացնել բազմակողմ ռազմածովային զորավարժություններ՝ Կասպից ծովի պետությունների Ռազմածովային ուժերի ներգրավմամբ, որոնք ուղղված կլինեն նավագնացության և ծովային տնտեսական օբյեկտների անվտանգության ապահովմանը», - ասվում է հայտարարության մեջ։

Ընդ որում, զորավարժությունների ընթացքում նախատեսվում է կատարել որոնողափրկարարական գործողությունների համակարգման վարժանքներ։ Ռուսաստանի պաշտպանության նախարարությունն ընդգծել է, որ Կասպից ծովի փակ ջրերում գործողությունները պետք է իրականացվեն բացառապես Կասպից ծովի հինգ ափամերձ պետությունների կողմից։