Թուրքիայի Անվտանգության խորհուրդը քննարկել է Բաքվի և Երևանի միջև խաղաղության գործընթացը

Թուրքիայում տեղի է ունեցել Ազգային անվտանգության խորհրդի նիստ, որը վարել է նախագահ Ռեջեփ Թայիբ Էրդողանը։

Caliber.Az-ի փոխանցմամբ՝ այս մասին նշված է Թուրքիայի նախագահի կապի վարչության X-ի էջում։

Խորհրդի նիստում ներկայացվել է տեղեկատվություն երկրի ներսում և արտերկրում ազգային միասնությանը, համերաշխությանը և գոյատևմանը սպառնացող տարբեր սպառնալիքների և վտանգների դեմ պայքարի համար ձեռնարկվող վճռական, նպատակային և հաջողված գործողությունների մասին։ Հատուկ ուշադրություն է դարձվել PKK/KCK-PYD/YPG, FETÖ և ԻՇԻԴ ահաբեկչական կազմակերպությունների գործունեությանը, ինչպես նաև վերջին միջազգային զարգացումներին։

Նշվում է, որ Ադրբեջանի և Հայաստանի միջև խաղաղության գործընթացում վերջին դրական զարգացումների լույսի ներքո քննարկվել են երկկողմ և տարածաշրջանային համագործակցության հնարավորությունները, վերահաստատվել է Հարավային Կովկասում խաղաղություն, կայունություն հաստատելու և զարգացումն ապահովելու կամքը։