Զախարովա. Ռուսաստանը պատրաստ է շարունակել ջանքերը Հարավային Կովկասում խաղաղության հասնելու համար

Ռուսաստանը պատրաստ է շարունակել ջանքերը Հարավային Կովկասում խաղաղության և կայունության հասնելու համար:

Caliber.Az-ի փոխանցմամբ՝ այս մասին ավանդական ճեպազրույցի ժամանակ ասել է Ռուսաստանի դաշնության ԱԳՆ պաշտոնական ներկայացուցիչ Մարիա Զախարովան՝ ի պատասխան News.ru-ի հարցին:

Նրա խոսքով՝ Մոսկվան վճռական ներդրում է ունեցել Ադրբեջանի և Հայաստանի միջև ռազմական գործողությունների դադարեցման գործում, մասնավորապես՝ 2020 թվականի աշնանը:

«Մենք միշտ մեծ ուշադրություն ենք հատկացրել հայ-ադրբեջանական կարգավորման հումանիտար հարցերին: Ռուսաստանն ակտիվորեն աջակցել է ռազմագերիների, կալանավորների փոխանակմանը, անհետ կորածների որոնմանը և ականապատ դաշտերի քարտեզների փոխանցմանը: Ռուսաստանը պատրաստ է շարունակել այդ ջանքերը, որոնք տանում են դեպի խաղաղություն և կայունություն Հարավային Կովկասում»,- ասել է Զախարովան։