Լավրով. Հայաստանը կշահեր ՀԱՊԿ առաքելության տեղակայումից

Հայաստանը կշահեր Հավաքական անվտանգության պայմանագրի կազմակերպության առաքելության տեղակայումից և կստանար ավելի կայուն իրավիճակ։

Ինչպես հայտնում է Armenia.Az-ը, այս մասին «Ցարգրադ» հեռուստաալիքին տված հարցազրույցում հայտարարել է՝ ՌԴ ԱԳ նախարար Սերգեյ Լավրովը։

«Մենք պատրաստ էինք նույն կերպ (ինչպես Ղազախստանում 2022 թվականի հունվարին - խմբ.) օգնելու ՀԱՊԿ այնպիսի անդամին, ինչպիսին Հայաստանն է։ 2022 թվականի աշնանը կազմակերպության Երևանում կայանալիք գագաթնաժողովի համար փաստաթուղթ էր պատրաստվել՝ Հայաստանի տարածքում ՀԱՊԿ դիտորդական առաքելություն տեղակայելու մասին՝ մեր հայ դաշնակիցների խնդրանքին համապատասխան։ Փաստաթուղթը լիովին համաձայնեցվել էր արտգործնախարարների մակարդակով։ Հետո վերջին պահին հենց գագաթնաժողովում հայ ընկերները խնդրեցին հետաձգել դրա ընդունումը։ Մինչ այժմ այն մնում է թղթային տեսքով և չի կարող իրականացվել»,- հայտարարել է Լավրովը։

ՌԴ ԱԳՆ ղեկավարի խոսքով, «եթե Երևանը հաստատեր այն, ինչ արդեն համաձայնեցված էր և պատրաստ մնար ստորագրմանն ու ուժի մեջ մտնելուն, ես համոզված եմ, որ Հայաստանը կշահեր և ավելի կայուն իրավիճակ կստանար»։