Ուկրաինան շնորհակալություն է հայտնում Ադրբեջանին ԼՈՒՍԱՆԿԱՐ

«Մեծ հաճույքով Գերագույն Ռադայի փոխնախագահ Օլենա Կոնդրատյուկի հետ ճանապարհեցինք երեխաների առաջին խմբին, որը օգոստոսի 2-ի երեկոյան Ուկրաինայից ավտոբուսով մեկնեց Վարշավա՝ հաջորդ չվերթով Բաքու՝ հանգստանալու Ադրբեջանում. Բաքու է մեկնել 30 երեխաներից բաղկացած խումբը՝ կազմված նրանցից, որոնց ծնողներն այժմ ռազմաճակատում են, ինչպես նաև Ուկրաինայի զոհված պաշտպանների երեխաներ։

Ինչպես հայտնում է Caliber.Az-ը, այս մասին ֆեյսբուքյան իր էջում գրել է՝ Ուկրաինայի Գերագույն Ռադայի փոխխոսնակ Օլենա Կոնդրատյուկի խորհրդական, Ավստրալիայում, Թուրքիայում, Ադրբեջանում և Լատվիայում Ուկրաինայի նախկին դեսպան Ալեքսանդր Միշչենկոն։

Նա նշել է, որ Ադրբեջանում ուկրաինացի երեխաների հանգստի կազմակերպիչը, հյուրընկալողը ԱՀ աշխատանքի և սոցիալական պաշտպանության նախարարությունն է։

«Այս տարվա մայիսին Օլենա Կոնդրատյուկի Բաքու կատարած աշխատանքային այցի շրջանակներում հանդիպումներ են կայացել՝ Գերագույն Ռադայի փոխնախագահի և նախարարության ղեկավար Սահիլ Բաբաևի միջև, որտեղ քննարկվել են՝ Ադրբեջանում ուկրաինացի երեխաների կազդուրման և վերականգնման ծրագրին վերաբերող բոլոր հարցերը։ Ծրագրի իրականացմանն ակտիվորեն ներգրավված է Ադրբեջանում Ուկրաինայի դեսպանատունը, որը մշտական կապի մեջ է երեխաներին Ադրբեջան ուղեկցող անձանց հետ»,- ասված է Գերագույն Ռադայի փոխխոսնակի խորհրդականի հաղորդագրության մեջ։

«Մենք շնորհակալություն ենք հայտնում Ադրբեջանին՝ մեր ապագայի՝ ուկրաինացի երեխաների առողջության բարելավման համար: Շնորհակալություն պաշտոնական Բաքվին՝ Ուկրաինայի ինքնիշխանությանն ու տարածքային ամբողջականությանը՝ ռուսական ագրեսիայի դեմ պայքարի համատեքստում անփոփոխ դիրքորոշման համար»,- ընդգծել է Գերագույն Ռադայի փոխխոսնակի խորհրդականը։