Ադրբեջանը բարձր է գնահատում եղբայրական Սաուդյան Արաբիայի դիրքորոշումը Հիքմեթ Հաջիևի հայտարարությունը

Ադրբեջանն աշխատում է ամուր ռազմավարական հարաբերություններ հաստատել Սաուդյան Արաբիայի հետ, որը նա համարում է բարեկամ և եղբայրական պետություն։

Ինչպես հաղորդում է Caliber.Az-ը, այս մասին Asharq Al-Awsat-ին տված հարցազրույցում ասել է՝ Ադրբեջանի նախագահի օգնական Հիքմեթ Հաջիևը։

Նրա խոսքով, երկու երկրների միջև հարաբերությունները կրում են բարեկամական, եղբայրական ու գործընկերային բնույթ։

Նախագահի օգնականի վերջին այցը Սաուդյան Արաբիա տեղի է ունենում երկու երկրների միջև երկկողմ հարաբերությունների ամրապնդման ֆոնին և նախատեսում է հետագայում զարգացնել համագործակցությունը տարբեր ոլորտներում և բացահայտել դրա համար նոր հնարավորություններ։

«Ադրբեջանական ժողովուրդը բարձր է գնահատում մեր եղբայրական երկրի՝ Սաուդյան Արաբիայի հաստատուն դիրքորոշումը Ադրբեջանի դեմ Հայաստանի ռազմական ագրեսիան դատապարտելու հարցում»,- ասել է նա։

«Մենք ակնկալում ենք հետագա առաջընթաց հարաբերություններում, մենք ձգտում ենք հետագայում զարգացնել համագործակցությունը Սաուդյան Արաբիայի հետ տնտեսական և առևտրային ոլորտներում, ներդրումների և կապերի աճ այնպիսի ոլորտներում, ինչպիսիք են գյուղատնտեսությունը և պարենային անվտանգությունը»,- ասել է Հաջիևը, հատուկ ընդգծելով՝ Սաուդյան ընկերությունների կողմից Ադրբեջանի ազատագրված հողերի վերականգնման նախագծերում ակտիվ մասնակցության ակնկալիքները։

Նրա խոսքով, երկու երկրներն աջակցում են միմյանց Չմիավորման շարժման, Իսլամական համագործակցության կազմակերպության և այլ միջազգային կառույցների շրջանակներում։ «Մենք բարձր ենք գնահատում Սաուդյան Արաբիայի դերը՝ Պարսից ծոցի արաբական պետությունների համագործակցության խորհրդի և Արաբական պետությունների լիգայի երկրների հետ Ադրբեջանի կապերի ամրապնդման գործում»։