ՆԱՏՕ-ն հավանություն է տվել ադրբեջանա-ռումինական նախագծին ԼՈՒՍԱՆԿԱՐ

Բուխարեստի թվային նորարարությունների գագաթնաժողովի շրջանակներում Ռումինիայի մայրաքաղաքի խորհրդարանի պալատում տեղի է ունեցել «Կրիտիկական ենթակառուցվածքների պաշտպանություն 2024» միջազգային համաժողովը։

Ինչպես հաղորդում է AZERTAC-ը՝ հղում անելով Ադրբեջանի Հատուկ կապի և տեղեկատվական անվտանգության պետական ծառայությանը (ՀԿՏԱՊԾ), համաժողովին մասնակցել է ՀԿՏԱՊԾ վարչության պետ Թուրալ Մամեդովը։

Ելույթ ունենալով «Պատրաստվելով արտակարգ իրավիճակներին էներգետիկ ենթակառուցվածքների աշխատանքի ընդհատումների դեպքում» պանելային նիստում՝ Թուրալ Մամեդովը խոսել է Critical Infrastructure Defense Challenge 2023 կիբերփառատոնի մասին, որն առաջին անգամ անցկացվել է Ադրբեջանում անցյալ տարի։

Թուրալ Մամեդովը հայտնել է, որ Cyber Polygon համատեղ նախագիծը, որը պատրաստվել է Ադրբեջանի Հատուկ կապի և տեղեկատվական անվտանգության պետական ծառայության և Ռումինիայի Ինֆորմատիկայի հետազոտությունների և զարգացման ազգային ինստիտուտի կողմից, և որի նպատակն է բարձրացնել կարևոր էներգետիկ ենթակառուցվածքների տեղեկատվական անվտանգությունը, հավանություն է ստացել ՆԱՏՕ-ի «Գիտություն՝ հանուն խաղաղության և անվտանգության» ծրագրի կողմից։