Բաքուն և Անկարան հուշագիր են ստորագրել աուդիտի վերաբերյալ

Ադրբեջանի Հաշվիչ պալատը և Թուրքիայի Հանրային վերահսկողության, հաշվապահական հաշվառման և աուդիտի ստանդարտների կազմակերպությունը (KGK — Kamu Gözetimi, Muhasebe ve Denetim Standardları Kurumu) ստորագրել են աուդիտի և հաշվապահական հաշվառման ոլորտում փոխըմբռնման հուշագիր։

Ինչպես տեղեկացնում է Report-ը՝ վկայակոչելով Հաշվիչ պալատին, փաստաթուղթը ենթադրում է երկու հաստատությունների միջև ինստիտուցիոնալ գործընկերության մեխանիզմների ստեղծում, աուդիտի կարգավորում և որակի բարելավում, ֆինանսական հաշվետվությունների թափանցիկության և հուսալիության բարձրացում, աուդիտորների համատեղ հավաստագրում և համագործակցություն փողերի լվացման և ահաբեկչության ֆինանսավորման դեմ պայքարում։

Հուշագրի համաձայն՝ կողմերը կընդլայնեն տեղեկատվության և փորձի փոխանակումը, կհամագործակցեն աուդիտի և հաշվապահական հաշվառման ստանդարտների կիրառման, որակի արտաքին վերահսկողության մեխանիզմների, մարդկային ռեսուրսների զարգացման և համատեղ ուսումնական ծրագրերի շուրջ։