Գազի ոլորտում Ադրբեջան-ԵՄ համագործակցությունը չի հակասում Ռուսաստանի շահերին. ՌԴ ԱԳՆ

Ադրբեջանի և ԵՄ միջև ստորագրված՝ գազի մատակարարման ծավալների մեծացման մասին փաստաթուղթը չի հակասում Ռուսաստանի ու Ադրբեջանի միջև դաշնակցային փոխգործակցության հռչակագրի դրույթներին:

Ինչպես տեղեկացնում է Caliber.Az-ը, այս մասին ճեպազրույցի ժամանակ ասել է ՌԴ ԱԳՆ տեղեկատվության և մամուլի դեպարտամենտի ղեկավարի տեղակալ Իվան Նեչաևը:

«Խոսքը վերաբերում է էներգետիկայի ոլորտում ռազմավարական համագործակցության մասին փոխըմբռնման հուշագրին, որը Ադրբեջանի և ԵՄ-ի միջև ստորագրվել է հուլիսի 18-ին։ Չենք կարծում, որ նմանօրինակ փաստաթուղթը հակասում է փետրվարի 22-ին ՌԴ-ի և Ադրբեջանի միջև կնքված դաշնակցային փոխգործակցության մասին հռչակագրի դրույթներին», - ասել է Նեչաևը։

Նրա խոսքով` ցանկացած պետություն իրավունք ունի ինքնուրույն որոշելու, թե ինչպես և ում հետ զարգացնի հարաբերությունները, այդ թվում` նավթագազային ոլորտում։