Չինգիզ Ալլազով. Ինձ համար կարևոր էր ոչ թե գոտին, այլ հաղթանակը Գրիգորյանի նկատմամբ

Աշխարհի ուժեղագույն քիքբռնցքամարտիկներից մեկը՝ Ադրբեջանը և Բելառուսը ներկայացնող Չինգիզ Ալլազովը, մեկնաբանել է՝ Թաիլանդի ONE Fight Night 13 մրցաշարում հայ մարտիկ Մարատ Գրիգորյանի նկատմամբ տարած հաղթանակը, գրում է azerisport.com-ը։

«Դա ծանր մենամարտ էր: Այս հաղթանակը իմ կարիերայի լավագույն պահերից մեկն էր։ Ինձ համար կարևորը գոտին չէր, այլ հաղթանակը Գրիգորյանի նկատմամբ։ Սա այն է, ինչ կարևոր էր իմ կյանքում, կարիերայում և ժառանգությունում»,- հայտարարել է Ալլազովը:

Ադրբեջանցի մարտիկը նշել է, որ մենամարտից մի քանի օր առաջ կարող էր հրաժարվել. «Ես հոգեպես թույլ էի, քանի որ անցյալ շաբաթ ընտանիքում խնդիրներ կային։ Մենամարտից երեք օր առաջ ես մտածեցի. «Գուցե պե՞տք չէ մենամարտել»։ Բայց հետո ես ինքս ինձ ասացի. «Ոչ, Չինգիզ: Դու պատրաստ ես այս պայքարին։ Առաջ: Աստված է տվել քեզ այս պայքարը: Ես անպայման հաղթելու եմ»։

Գլխավորը հաղթելն էր։ Իմ մարզիչը լավագույնն է աշխարհում: Մենք լավ ծրագիր ունեինք մենամարտի համար։ Մենք չէինք նախատեսում նոկաուտով հաղթել Գրիգորյանին. Մենք հինգ ռաունդի հույս ունեինք»։