Թուրք նախարարը նշել է Զանգեզուրի միջանցքի գործարկման հնարավոր ժամկետները
Երկաթուղու կառուցման աշխատանքները, որը Թուրքիայի Կարս քաղաքը կկապի՝ Նախչըվանին սահմանակից Իգդիրին, նախատեսվում է սկսել այս տարվա վերջին եւ ավարտել հինգ տարվա ընթացքում։ Այս գիծը թույլ կտա գործարկել Զանգեզուրի միջանցքի կարևոր բաղադրիչը։
Ինչպես հայտնում է Caliber.Az-ը, այս մասին TGRT Haber հեռուստաալիքի եթերում հայտարարել է՝ Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն։ Նա հիշեցրել է, որ Թուրքիայի արևելքում 224 կիլոմետր երկարությամբ երկաթուղու կառուցման մրցույթ է հայտարարվել այս տարվա սկզբին, և ներկայումս բանակցություններ են ընթանում նախագծի ֆինանսավորման շուրջ։ «Կարսից մինչև Դիլուջու սահմանային անցակետի հատվածի կառուցումը Ադրբեջանի հետ սահմանին՝ կտևի մոտ 5 տարի»,- հայտնել է նախարարը։
Նա պատմել է նաև Զանգեզուրի միջանցքի կարևորության մասին համաշխարհային առևտրի համար՝ ընդգծելով Սուեզի ջրանցքի և Կարմիր ծովի միջադեպերի հետ կապված ռիսկերը. «Զանգեզուրի միջանցքի բացման արդյունքում Ասիայի և Եվրոպայի միջև տնտեսական կապեր հաստատելու նոր նշանակալի այլընտրանք է առաջանալու».
Միաժամանակ Աբդուլքադիր Ուրալօղլուն չի բացառել, որ Զանգեզուրի միջանցքը կարող է անցնել Իրանի տարածքով. «Մենք գիտենք, որ Ադրբեջանը բանակցություններ է վարում Իրանի հետ այդ հարցի շուրջ։ Վերջնական որոշում դեռ կայացված չէ։ Հնարավոր է, որ միջանցքի որոշակի հատվածներ անցնեն և՛ Իրանով, և՛ Հայաստանով»։